AHAM Adokgre Regional Unit, Adokgre Organic Farmers’ Cooperative Society, Nokma Sardar-rang aro wilwila songni manderang Adokgre jolni school-rangko taridape on·china Education Minister Rakkam Sangma-o mol·molataha.
Uamangni janapatgipa school-rangara Memillam L.P school, Nangilding L.P school, Jajil L.P school, Dobanggal L.P school, Ildek Reserve L.P school, Dosaram L.P school, Reking L.P school, Chigrang L.P school, Waramja L.P school, Gorok L.P school aro Tinsimina L.P school jerangkon ru·uta bilsirangna galchipe donani a·sel nosto ong·aha ine u·iataha. Ia school-rangan A·dokgre aro wilwilao donggipa biaprangna namen gamchatbegipa ong·a aro taridape on·a nangchongmotenga jean Right to Education Act-nigita Free and Compulsory Education-ni on·gimin niamko rakkiani ong·gen ine parakataha.
Janapgimin school-rangni pakmarang, skichakgipa kutturirang, do·ga kelkirang aro nokkingrangni obostarang namjabeaha. School-rang namjani a·selo bi·sarangna aro staff-rang kenchakaniba ong·enga, unbaksana, mikka wachi karirango nokkingrang sele skina man·jaenga aro skiani ostrorang dongjae pilaknigitan neng·nikaniko on·enga. Ia school-rangko taripiltaie tangchapilatode bi·sarangna namgniko on·an baksana sorkarioba ka·donganiko ra·bagen aro songsalna tang·doani ong·gen ine uamang parakataha.
Unbaksana, uamang pilak C&RD Block-rangna District Institute of Education and Training (DIET) Resubelpara-o apsandake seat-ko suale rakkichina Deputy Commissioner NGH-na janapataha. Iasan ong·aigija, Adokgre antidamo neng·nikanirang bang·ani gimin ATM-ko bosaie on·chinaba u·iatangaha.
