East Garo Hills, Police dolrang Chibilbang songoniko donnue dongipa silchidare aro golirangko man·aha. Police-rangni man·gipa bosturangara homemade pistol ge·sa, AK rifle-ni rong 428 gulirang aro ge·gni live motor shell-rang ong·a.
Uamang ia bosturangko Budbar walgimik aro January 30 tarikko man·chape san·die pring walo man·aha. Police Superintendent, A S Rynjah-ni agananigitade ia bosturangko uamangni manderangoni kobor on·timgiparangoniko ma·sienba sandiaha ine u·iataha.
Ia donnue dongipa silchidarerang aro gulirangko gitcham bobil dol dake chakatgipa Garo National Liberation Army (GNLA) dolni ong·gen ine chanchichipenga. Ia jolrango uamangni sianggipa dilgipa, silchidarerangko donnuronga ineba ma·sianirang gnang. GNLA bobil dolni bon·changdike dipetan apsandakgipa silchidarerangko ia jolo man·rongbaenga.
