A∙doko koela cho∙aniko scientifically ba kragipa bewalo niamgita kamrangko a∙bachengatna skanggipa ja∙kurangko de∙na man∙anian Meghalaya na katchabeani sal ong∙a ine Chief Minister Conrad Sangma mijal salo parakangaha. Ministry of Coal baksa a∙dok sorkarini bakrime kam ka∙anichi niamrangko ja∙rike koela ko scientifically cho∙na raiko on∙aha ine CM parakataha.
Ian samtangtango donggiparangko bang∙e nisiatgija aro a∙dokna kajina man∙aniko apsangrik ong∙e nirokange kragipa ja∙kurangko de∙e kam ka∙angna miksongani ong∙a ine CM aganangaha.
Ia ja∙ku de∙anio ge∙gittam Escrow agreement rangko Controller of Coal, Government of India aro koela cho∙na rai on∙gimin project-ni biaprang jekai West Khasi Hills ni Pyndengshalang, East Jaintia Hills ni Saryngkham aro Lumiakhi-Wahsarang baksa songgigrikaniko dakangaha.
Ia ge∙gittam projectrangna agreba ge 12 application rangkoba ra∙chakna kamrangko ka∙ani bon∙kamgipa gadangona sokengaha ine CM aganangaha jekon a∙dok sorkari Department of Mining and Geology baksa kam ka∙e ta∙rake matchotatna jotton ka∙enga ineba parakataha.
Koela cho∙aniko ra∙bapilna man∙anian manderangna kam on∙a dakchankangan baksana a∙dokni kajina man∙aniko bariatna aro koela cho∙ani a∙selo nisiatgipa man∙gipa biaprango nanggipa rika cho∙anirangko ra∙bana man∙anggen ine CM aganangaha.
Meghalaya a∙dokni gamjinrangko ia scientific mining ko ra∙gatanichi baikamgipa aro kragipa bewalo koela ko bikotna dakchakani ong∙anggen.
