Uniform Civil Code (UCC) ko ra·gataniara kragijagipa aro ja·rikna neng·gipa ong·a maina a·songo tribal jatrangni daka rikanirang aro bebe ra·anirang namen dingtanggrikaniko ma·sichakna nanggen ine Chief Minister Conrad Sangma aganangaha.
UCC ni miksonganiara UCC bill aro act baksa namen dingtanggrikani gimin ia minggniko apsan ong·e chana nangja ine CM aganangaha. India a·songo tribal aro songdong a·chakamgipa jatrangni daka rikanio aro bebe ra·anio bang·a dingtanggrikanirang gnang jekon Uniform Civil Code ni miksongagita gimikon apsan dake ong·atna man·chongmotjawa aro indakgipa niamko ra·gataniara kragipaba ong·ja ineba Chief Minister aganangaha.
Iako aganengon, songdamkamgipa jatrangni niam reti aro bilrangko rakie adita niamrangko apsan ong·atna man·gen ine Sangma janapangaha. Uttarakhand a·dok, ia UCC ko ra·gatchenggipa ong·a jeon tribal jatrangni daka rikanirangko changale uamang ia kamko ka·angaha.
Ia bill nigita national ba state ni gadango a·song gimiko ma·gipani chatchiko ra·e ba matrilineal system ko Meghalaya a·dokni ja·rikagita ge·etgenchimode ia niamko Meghalaya a·dok ra·chakna maming neng·nikani dongjawa ine CM aganangaha.
Meghalaya a·doko UCC ko ra·gatna maming miksongani dongja aro a·dok sorkarinigita tribal jatrangni niam reti aro daka rikanirangko mande ra·an baksana mikkangchiba chel·chakanggen ine Conrad Sangma janapangaha.
