Da·al salo CM Impact Meghalaya Class Readiness Program e-Book ko Chief Minister Conrad K Sangma oprake on·angaha. Ia oprakanio Chief Secretary D P Wahlang, Education ni Commissioner & Secretary Vijay Mantri aro MIDC ni Chairman James K Sangma ba bakko ra·angaha.
Ru·uta somoirangonin a·dokni pora skiani gadangrangko nambatatna sorkari rakbee kamrangko ka·angenga ine Chief Minister aganangaha. Pora skiani a·bao skigiparangko, rika cho·ani aro skul rangni dingtang dingtang bakrangko namdapatna bang·a neng·nikanirangko chagrongna nangronga ine aganan baksana secondary skul rangni porikkarango pass percentage ko tang·doatnaba kamrangko ka·angenga ine aganjolangaha. Meghalaya Class Readiness Program ko a·bachengatanichi chatro chatrirangna secondary gadangko mangmangsan namdapatna miksongaigija primary aro upper primary ni gadangoba nambate skie ra·na cholko on·anggen ineba CM aganangaha.
Ia program ko ra·gatna miksonganiara chatro chatrirangni u·ianiko bariatna aro pora skiani a·bako tang·doatani ong·a. Ian poraigipa bi·sarangni skie ra·ani ja·pangko janggitanga gimikna mangrakatna cholko on·an baksana nambata gadango mark rangko man·aba dakchakanggen ine u·iatangaha.
Ia program nigita Class 1 oni 10 o poraienggipa bi·sarangna mikkangchi nambate re·mikkangna nangchongmotgipa skie ra·ani aro changa sapaniko on·a dakchakanggen jekon tarigimin niamrango pangchake pilak skigiparang aro chatro chatrirang anti brina apsan bakko ra·ange nanggipa skie ra·aniko dakanggen.
