Micro, Small and Medium Enterprises (MSMEs) ko dingtang mancha ra·dona kam ka·na da·al February 25 tariko RBI Shillong nigita Town Hall Meeting ba tom·aniko Selsella, West Garo Hills-o ong·atanga. Ia tom·anio dingtang mancha Cashewnut, Grit aro Wa·a rango pangchake kam ka·gipa manderangna ong·atangaha jeon sak 200 MSME entrepreneur rang re·bae bak ra·an baksana adita gamchatgipa chanchirimaniko dakangaha.
Ia Town Hall Meeting-o Shillong, Reserve Bank of India ni official rang baksa dingtang dingtang bank rangni Regional Heads/ Senior Official rang aro MSME-DFO, DCIC, SIDBI o kam ka·giparangba bakko ra·angtokaha.Ia tom·aniko oprake on·anio RBI Shillong ni Deputy General Manager (DGM) Navneet Singh Nagar dingtang mancha indakgipa Town Hall Meeting rango MSME ni bidingo u·iatna gamchataniko aro bang·a entrepreneur, banko kam ka·giparang, sorkarina dangdike on·giparangko apsan bakrime kam ka·na dakchakani cholko ra·baaniko aganangaha.
Una agreba a·dok sorkarini MSME sector ko ra·dona adita scheme rang jekai PM Vishwakarma Scheme aro gipin scheme rangni bidingo ma·sie ra·e indakgipa cholko ra·pachina West Garo Hills Tura, District Commerce and Industries Centre ni General Manager Don Felicient R Marak didiangaha. MSME sector na ma·mong sorkarini on·gipa scheme rangni bidingoba MSME-DFO ni Assistant Director Durgesh Pandey aganangaha.
Unbaksana bank rangni senior official rang aro Selsella CR&D Block o kam ka·giparangba MSME ni bidingo krae ma·sie ra·china aro entrepreneur rangko ia on·gimin cholrangko ra·chinaba didiangaha.
Ia tom·anio Selsella jolo donggipa entrepreneur rang an·tangtangni chu·sokgimin kamrangni bidingo aganan baksana gitalgipa entrepreneur rangnaba uamangni ku·pattianirangko on·angaha. Iasan ong·aigija, bank aro sorkarinigita dakchakenggipa scheme aro loan on·gipani bidingo entrepreneur rang uamangni jajaaniko singanganiko dakangani ja·mano, sokbagipa official rang uamangna dingtang mancha tale on·ataha.
