Rongjeng block-ni ning·o sorkari L.P School-rangko taridapani kamrangko chu·ongnikjae jolni bakrimgimin NGO dolrang East Garo Hills a·jani Deputy Commisioner-na janapataha. Jolni school-rangko taridapna ba rikdapna tangka paisarangko chamatahaoba bi·sarangni aro skigiparangni naljokaniko nichange kamrangko name ka·jaha ine NGO dolrang parakataha. Uamangna songni nokni manderang, ma·aparang aro skigiparangba school-rangko taridapani kamrangni namgijaniko koborrangko sokataha.
NGO dolrangni janapatanigitade, school nokrangko taritaianio namgijagipa bosturangko jakkalaniko, kam ka·enggiparangni simsakgija dakaniko, matchotgija tariani aro mikkangchina chanchisamsao donggijaniko u·ina man·aha. Deputy Commissioner-ko uamang Rongjeng block-o donggipa ia school-rango kam ka·aniko mongsongbate A, B aro C category (Annexure) rangko nirokechina didiataha. School-o kam ka·anirangko miksonggimin aro chamatgimingita name tarie on·china DC-ko NGO dolrang mol·molangaha.
Iasan ong·aigija, contrator-rangni kosakoba kamrangko name jako ra·gija ka·anina raka ja·kuko de·china uamang didiatangaha.
