Manipur-ni Chief Minister Biren Singh February 7 tarik, Robibar salo kamtangko watangna tik ka·e Manipur-ni Governor Ajay Kumar Bhalla ni jako resignation letter ko Imphal-ni Raj Bhavan-o on·angaha. Ian Kuki aro Meitei jatgnini gisepo batanggimin May 2023 bilsionin dinggrikaniona soke kajia golmal rang ong·e sak 200 na batpile manderang an·tangtangni janggiko gimaataona sokangaha.
2024 bilsini August jao, ia ong·enggipa obostako ma·mong sorakari baksa melie kam ka·e dakchakaniko ra·e ta·raken namatpilna ku·watgenchimoba da·ona kingkingba maming namdapataniko ra·bana man·jaha.
Uni kamtangko watna skang Singh, Robibar salo Union Home Minister Amit Shah, BJP ni MP Sambit Patra, a·dokni ministerrang aro MLA rangko grongani ja·mano Governor ko gronge ia ja·kuko de·angaha.
