Williamnagar songjinmao East Garo Hills District Planning and Development Committee (DPDC)-ni Chairman aro Rongjengni MLA Jim M Sangma ni dilanio Williamnagar Circuit House-o tom·aniko ong·ate sorakarini department, rika cho·ani program aro gipin neng·nikanirangni bidingo Sombar sal, February 10 tariko chanchirimangaha.
Ia tom·anio PHE, Soil and Water Conservation aro Housing ni Minister Marcuise Marak, Deputy Commissioner Vibhor Aggarwal, District Planning Officer aro ADC DA Sangma, DRDA ni Project Director, BDO rang dingtang dingtang line department rangni officer rangba bakko ra·angtokaha.
A·jao ka·enggipa kamrangko name dake nirok simsakna man·a aro nangchongmotgipa ja·kurangko de·na man·agita committee ni tom·e chanchina nanganiko Deputy Commissioner uni rimchaksoani kattao janapangaha.
Ia committee ni tom·na nangchongmotaniara a·jarango dingtang dingtang development ni kamrangko nirok simsakna aro neng·nikanirangko ritchengatna Chief Minister ni niksamsoe kam ka·ani ong·a aro DPDC an iani bidingo nirokatna ge·sa cholko ra·baa ine PHE Minister aganangaha.
Sorkarini departmentrang jekai District Commerce and Industries Centre, Animal Husbandry and Veterinary, Art and Culture, Social Welfare, Tourism, Agriculture, Sericulture and Weaving, Water Resources, PWD, PHE, Urban Affairs, Education, Soil and Water Conservation, Supply, Housing, Forest, Health, Fisheries, Cooperation, C&RD Blockrang, DRDA, Banks & Skill Development aro gipin department rangba chanchirimani agenda-o man·chapataha.
