Da·al salo, Bureau of Indian Standards (BIS) ni bidingo skie on·agita DRDA Conference Hall, Tura-o Sensitization aro Awareness Program-ko ong·atangaha. Ia program, 2nd Meghalaya State Level Committee tom·bimonganio ong·atna tik ka·gimin ong·a jekon West Garo Hills a·jao donggipa dingtang dingtang department rangna aro bida pakwatgiparangna skie ma·siataniko dakangaha.
Guwahati-ni C BIS Scientist, Ashutosh Rai, program-ona sokbagiparangna BIS-ni miksongani aro kam ka·anirangko u·iatangaha. BIS jean National Standards Body of India, Ministry of Consumers Affairs-ni ning·o man·gipa ong·a. Ian dingtangmancha consumer ba tarigimin bosturangko bree jakkalgiparangna namgipa quality-ko on·a, uamangko naljokatna, nama aro namgijani bidingo certification aro mikrakatanirangko on·aniko daka. BIS, dingtang dingtang bosturang jekai cement, paver block, helmet aro uandake gipinrangko taria jekon Rai sorkarini department-rangko BIS certified ka·gimin bosturangko ra·na man·gen ine aganangaha. BIS-ni ra·chakgimin bosturangni namgniko ua aganange consumer-rang jakkalengon baikamgipa aro naljokanikoba on·a ine Ashutosh Rai u·iatangaha.
SPO, BIS Nishnu Das, BIS-ni kam ka·anirangko aro bosturangni namaniko bariatna bida pakwatchakram biaprango skie on·aniko dakenggipanirangni bidingo aganangaha. Da·alni program-o FCS & CA, Tura-ni Joint Director, N M. Marak baksana FCS & CA Tura-ni Superintendent, J K. Marak aro dingtang dingtang department-rangni dilgiparangba dongpae bakko ra·angtokaha.
