Assam a·dokoni Garo Hills-ona niamni a·palo ra·napbaenggipa drugs badinggipa sakbri manderangko West Garo Hills, Selsella thanani ning·ao man·gipa Balachanda songo Anti-Narcotics Task Force (ANTF) dol rim·aha. Police-rangni checkpoint-ona sokon uamang sakbri jajaenba police-rangni rikaoni gariko ta·rake sale katengon drug-rangko galona jotton ka·aha. Uamangni sale katenggipa ramako police dolrang Balachanda rama bijangchio changsotna man·aha aro sakbrikon a·damoniko rim·aha.
Police dolrang am·sandianiko dakani ja·mano garioniko ge 11 mang pekatgipa bosturangko kagimin box-rang aro ge 6 insulin syringe-rangko man·aha. Ian dal·begipa dolrang baksa bak donggiparang ong·naba gnang ine parakataha.
Rim·a man·gipa sakbri, SGH Baghmara Toseng R. Sangma (26), Rakkan R. Marak (27) North Garo Hills Bajengdoba, EGH Williamnagar-oni Sanchubirth S. Marak (22) aro WGH New Bhaitbari Safik Alam (21) ong·a. Iamang sakbriko Narcotic Drugs and Psychotropic Substances (NDPS) Act-ni ning·o rim·aha aro sing·sandianiko dakengkua dipet police custody-on donangkugen.
