Salgittamna ong·atenggipa Tura Industrial Fair 4.0-ko mijal saloni New Tura Matchakolgre L.P School kal·chakram bakrao a·bachengataha. Ia Industrial Fair o Tura DRDA ni Project Director Jude R T. Sangma mongsonggipa ong·e sokbaaha. Tura Industrial Fair-ko Tura District Commerce & Industries Centre (DCIC) ong·atenga aro iako ong·atani miksonganiara gital ong·katenggipa bading chiwale cha·na tarienggiparangna an·tangtangni bosturangko mesokjole pale sim·e cha·na nambegipa chol ko on·ani aro entreprenuer-rangko didianiko ra·baani ong·a.
Mongsonggipa sokgipa Project Director, West Garo Hills, Jude R T. Sangma, tom·anio aganengon, uni bakrimaniko parakange fair-o bak ra·giparangna didianiko on·angaha. Ian dingtang dingtang bosturangko tarina ba bikotna changgipa sapgiparangna saksa sakgipinoniko skie ra·na, bakrime kam ka·na aro dal·rorona namgipa chol ong·a ine aganangaha. DCIC-ni kamnaba Sangma demittelange indakgipa a·barango dake cha·giparangko nambata gadangrangona ra·dona didiangan baksa ka·donganikoba parakangaha. Garo Hills-o small scale industry-rangni a·dokna on·gilanirangko ua janapange sorkarini nikjumanggipa 10 billion economy-ona sokdona dakchakaniko on·gen ine Sangma aganangkuaha.
DCIC-ni General Manager, Felicient R. Marak, fair-ni bidingo talatengon, ian dingtang dingtang bosturangko tarina sapgiparang aro bakko ra·gipa jolni manderangna uamangni bosturangko mesokna cholko on·anian fair-ko ong·atani miksongani ong·a ine aganangaha. Ia a·damo pale sim·e cha·giparang aro bregiparang gonggrika. Entrepreneur-rangkoba ua saksa sakgipinoniko skie ra·china, ma·sianirangko agane on·china aro mikkangchi uamangni badinganirangko tang·doatna sing·e sane ra·enba ramako name tarie donchina Marak didiangaha.
Fair-o chu·gimik ge 60-na bate dokanrangko kuliaha, uamangoni ge 10 mang sorkari department-rangni ong·a jekai Animal Husbandry & Veterinary, Sericulture & Weaving, District Horticulture & Agriculture, Dairy Development aro gipinrang bakko ra·enga. Garo Hills-ni bang·a bakrangoni chong·motan Williamnagar, Chokpot, Tikrikilla aro gipin biaprangoniba re·bae an·tangtangni bosturangko dokanrango palangtokenga. Cha·ani ringani, bol, wa·a aro re-oniko sol·gipa repgiparang, sabon, siloniko dokgimin atte gitchirang, ripokrang, Dakmanda, bag aro uandake dingtang dingtang bosturangko ia fair-o man·gen.
