South West Garo Hills, Nogorpara-o Beti Bachao Beti Padhao (BBBP) ni bilsi 10 ong·aniko gisik ra·ani bak gita Social Welfare Department aro District Hub for Empowerment of Women (DHEW) baksa Krima No. VI Youth Ministry apsan nangrime awareness program-ko Borang Resort o Bristibar sal, February 13 tariko ong·atangaha.
Ia program-ko January 22 tarikoni March 8 tarik, 2025 ona me·chik bi·sarangna ia scheme nigita skie on·aniko aro me·chikrangna chel·chakaniko bilakdapatna miksonge ong·atangenga. Ia program-o gilja ge 8-ni dilgiparang, sak 350 chadamberang aro a·jani dilgiparangba dongpae bakko ra·angtokaha.Ia awareness program-ko me·chikrangna aro bi·sarangna songsalo janggi tangaonio nangrimanio adita neng·nikanirangko chel·chakna man·a gita DHEW ni Gender Specialist Chairy R Marak aganangaha.
Gisikni gita an·seng baljoke dongani gimin Ampati Civil Hospital-ni Clinical Psychologist Lenibell Dokatchi Marak u·iatangaha. Bi·sarangko niam gita ja·rike chel·chakaniko on·ani POCSO Act awareness-ni bidingo LCPO Taniya Derimchi Marak aro Domestic Violence awareness-ni bidingo Begimme Sangma aganangskaaha.
Ia program-o quiz competition aro sports-ni adita ka·lanirangkoba chadamberangna ong·atangaha. Kal·susaanio bako ra·e che·giparangna Rev Paramsingh Sangma aro Taniya Derimchi Marak boksisrangko suale on·angaha.
BBBP scheme-nigita me·chik bi·sarangko apsangrik ong·e ra·e pora skianiko on·an baksana apsangrik cholrangko on·e chel·chakna aro dakchakaniko on·a ia program-o aganangaha.
