Ma·mong, a·dok sorkari aro ANVC dol baksa gitcham Home Minister Rajnath Singh ni dilanio Agreed Text for Settlement (ATS) ko ra·gatna songgigrikgianiko da·onaba chu·sokate on·kujaenganina Tura ni MDC Bernard Marak ta·rake nipiltaie nirokatchina ku·rang on·angaha.
Ia songgigrikgianiko BJP dolni sorkariko rikani ja 6 ni gisepon ka·angaha jekon Congress sorkarini dilani somoio bilsi 10 ni gisepoba iako nipiltaianiko dakgija ru·utataha ine Marak aganangaha. A·doko Congress sorkari ia settlement process ko miksongmanchaen maming ja·kuko de·angjaha jekon NPP sorkariba apsan daken ia ku·rachakgiminko ra·gatna ru·utatenga ineba Marak aganangaha. Sixth Schedule ko namdapatanichi Autonomous District Council (ADC) rangko bilakdapatna cholko ra·bana man·genchimoba ia party rangan tribal manderangni kosako kamrangko ka·angenga ine Marak matnangataha.
ADC ona ma·mong sorkariniko tangka paisa chamataniko joljol ra·bae on·a aro tribal rangni niam reti, daka rikani aro sason ka·ani bewalko bilakdapatna BJP dolni nangnikgenchimoba Congress aro NPP dolrang BJP dol baksa songgigrikgiminko bimang ong·atna on·jaenganiko janapangaha. Ia songgigrikaniko 2014 aro 2025 bilsirango soi ka·genchimoba ADC rangna batanggimin bilsi 10 o maming namdapataniko ra·bana man·kujaengan baksana department ge 13 rangko ADC ona ra·bapilkujaenga aro re·anggipa bilsi 5-o changsa mangba tom·aniko dakdiljaha ine matnangataha.
Ia Agreed Text for Settlement ko soi ka·anichi ma·mong sorkarini gita ADC na bang·a kamrangko sokatgenchimoba sorkariko chalaienggiparang iako jakkalsrete a·dokni department rangona tangka paisarangko chamatangskaaha. Indake contractor rangni project rangko matchotgija donanichi aro tangka paisarangkk jakkalsrete Meghalaya a·dokni ADC rang Utilisation Certificate rangko mesokna man·gijaniko ta·raken ma·mong sorkarini dilgiparang baksa golpogrike u·iatanggen ine Marak agananga.
125th amendment nigita Sixth Schedule ko namdapatna miksonganiko a·doknigita kam ka·na gongjani a·sel da·onaba bimang ong·atna man·kujaenga jekon BJP dol Agreed Text for Settlement o pangchake ADC rangko bilakdapatna ja·ku de·anggen ine Marak bon·kame aganangaha.
