SWGH Ampati-o, Superintendent of Fisheries Office da·al salo National Fisheries Digital Platform Empowerment Program-ko ong·atangaha. Ia program-ko dingtang mancha jolni na·tok jile aro rim·e cha·giparangna gital chasongni cholrangko jakkale man·anirangko bariatna, jilanio baikamgipa cholko ja·rikna aro pale sim·e cha·aniko bakroatna miksonge ong·ataha.
Risa V.C. Sangma, Ampati-ni Superintendent of Fisheries, program-ni bidingo aganengon ian ma·sianiko skie on·a, sorkarini scheme-rangko talatna, weather forecast, antirangni gimin u·iatna aro na·tok rim·anio baikamgipa cholrangko dakchinagita manderangna ra·bagipa ong·a ine parakangaha. Ia program Pradhan Mantri Matsya Sampada Yojana (PMMSY) aro Meghalaya State Aquaculture Mission (MSAM) ni na·tok rim·e aro jile cha·giparangni janggi tanganiko tang·doatna miksongenggipani bakba ong·a ine Sangma aganangaha.
Program-ni bako digital platform demonstration aro training-ko na·tok jile cha·gipa aro beneficiary-rangna dakangaha. Uamangko dingtang dingtang ranta ka·anirangko dakate National Fisheries Digital Platform-ni namgniko man·agita u·i ma·sigiparang talatangaha. Bakko ra·giparang sorkari scheme-rango dorgasto galna, bajar antio ra·enggipa damrangko u·ina aro weather update-rangko mobile app-ko jakkale ma·sina skie on·angaha. Ia somoini bako uamangna digital record-keeping ni gamchatanikoba talatangaha jeon an·tangtang man·gnirangkosan ong·aigija tangka paisarangko jakkalani bidingo dakchakaniko on·anggen.
Program-o na·tok rim·gipa aro jile cha·giparangko National Fisheries Digital Platform-na registration-ko a·damon ka·atokaha. Registration ka·ataniko Common Service Centre (CSC), Ampati dakdilaha. Sokbagiparangna CSC-o kam ka·giparang digital profile-rangko tarina dakchakangaha jeon uamang sorkari scheme-rang, antini bidingo talna aro training-rangko altuae ra·na man·anggen. MSAM aro PMMSY-nigita uamangna na·tok bitchirang, cha·ani aro nanggipa bosturangkoba suale on·angjolaha.
