South West Garo Hills a·jao chashew ge·e cha·giparangko namdapatna “Improved Cashew Cultivation Practices” katta bichongko done Ampati circuit house-o training program-ko ong·atangaha. Program-ko CAU (Imphal) ni Multi Technology Testing Centre & Vocational Training Centre ong·ataha.
Ia program-ona SWGH a·jani Deputy Commissioner Hema Nayak mongsonggipa sokgipa ong·e bako ra·angaha. Unbaksa, gipinrang chong·motan Principal Scientist (Agril.Ento), Dr. T N Raviprasad, ICAR-DCR Puttur-ni Senior Scientist (Crop Improvement) Dr. Siddanna Savadi, ICAR-DCR Puttur-ni Scientist (Plant Pathology) Dr. Rajashekhar H , Horticulture department-ni officer-rang, MDMA-ni officer-rang, College of Community Science Tura-ni skigiparang aro dam 12 songni cashew-ko ge·e game cha·giparangba program-ona sokbatokaha.
Mongsonggipa sokgipa SWGH a·jani DC Hema Nayak, chonchongipa cashew-ko ge·e cha·giparangni man·gniko tang·doatna songsalo indakgipa program-rangko ong·atna nangchongmota ine aganangaha. Manderang namgipa ge·a gamani niamrangko ja·rike, pangrangko naljokatna aro biterangko man·ani ja·mano dakna nanggnirangko ia program-rangoniko ma·sie ra·na man·gen. Cashew-ko ge·ani gamchatanikoba janapange, a·jao cashew ge·aniko mongsonggipa ong·e ra·e tang·doatna cholrang bang·en donga ine Nayak agandapangaha.
College of Community Science-ni Dean Jyoti V Vastrad, Garo Hills-o cashew biterangko tarinagita processing unit-rangko bikotna nangani gamchataniko parakangaha. Garo Hills-o manderang cashew ge·genchimoba bang·bata changon nasie galengani gimin biterangoniko dingtang dingtang cha·ani ringani bosturangko tarinagita awareness program-rangko nangenga ineba ua aganangkuaha.
Puttur ICAR- ni Directorate of Cashew Research-ni Scientist-rang cashew nut-ko ge·e game cha·ani dingtang dingtang cholrang aro biteko cha·aniona tariani bidingo aganangaha. Ia somoio cashew-ko ge·e cha·giparang baksaba uamangni neng·nikanirang aro man·gnirangko bariate namdapatani bidingrangoba agangolgrikangaha. Uamangna program-o nanggipa bosturangkoba suale on·angjolaha.
