Garo Students Union (GSU) Central Executive Committee (CEC) HQ, Tura chatro chatrirangni man·a nangenggipa 2023-2024 bilsini scholarship-ko ta·raken on·china Chief Minister Conrad Sangma-o mol·molangaha. Ia Scholarship-ko Garo Hills-ni bida pakwatchakram a·damrangoni sak 1,021 mang chatro chatrirang man·gija dongenga. Scholarship-ko ru·uta salrangona on·gija donanichi bang·a chatro chatrirangan neng·nikanirangko man·tokenga ine GSU dol parakataha.
Garo Hills-ni bang·a bida pakwatchakram rangoni u·iatanigitade Tura Government College-oni sak 162 , Tura Christian College-oni sak 40, Mendipathar Government College-oni sak 109, Baghmara Government College-oni sak 45, Don Bosco College Tura-oni sak 512, Williamnagar Government College-oni sak 134, Babelapara Higher Secondary School-oni sak 19 aro Law College Tura-oni sak 45 chatro chatrirang scholarship-ko man·gija dongenganiko GSU dolrang parakataha.
Ia Scholarship-ko on·gija donani a·selo bang·a chatro chatrirangan neng·nikanirangko man·enga, mitam poraienggipa chatro chatrirangde ia scholarship-chin an·tangtangna nanganirang jekai tuition fees, ki·taprangko ra·na aro salantio nang·anirango jakkalnagita dakchakaniko on·enga ine GSU dolrang janapangaha. Uni gimin chatro chatrirangni man·a nangenggipa scholarship-ko ta·raken on·genchimode poraienggipa chatro chatrirangna namen dakchakani ong·gen ine GSU-ni President Zikku Balgra N. Marak Chief Minister Conrad Sangma-o mol·molangaha.
