Mijal salo NEHU Tura campus-ni Garo department aro A·chik Literature Society (ALS) Tura, International Mother Language Day-ko maniangaha. Ia manianiona faculty member-rang, research scholar-rang, academician-rang, lekka segiparang aro ALS-ni member-rang sokbatokaha.
Ia bilsio International Mother Language Day-ko maniani Silver Jubilee gapaniko Garo department-ni HOD Dr. Jacqueline R. Marak sokbagiparangna parakangaha. Pangna bilsian February 21 tariko ia salko gisik ra·ronga jean Bangladesh-o a·bachengbaaha jekon UNESCO uamangni 1999 General Conference-o ra·chakangaha ine Marak u·iatangaha. Ku·tangna ka·saaniko, mande ra·aniko aro ripingna nanganiko aganange, Dr. Marak dingtang mancha chadamberangko ku·tangko aganchina, dal·nikchina aro skie ra·china didiangjolaha.
Maniani bako Garo department-o poraianggipa gitcham chatro chatrirangni segimin ming 50 poedorangko jekon Chokchimsa Bite ine dongipa ki·tapko Prof. Fameline K. Marak mesokangaha. Ia bilsini March jao language documentation-ni bidingo ong·atnasienggipa workshop-ko Dr. Dokatchi Ch. Marak jinmana parakangaha. Garorangni dingtang dingtang biaprango ku agangipani bimingrangkoba Marak minge on·angjolaha. ALS-ni President, Prof. Caroline R. Marak-ni am·chimonggimin ia bimingrang jekai A·we, Ganching, Gara, Dual, Matabeng aro Abeng, jerangan Garorangni ku aganani apalaniko mesoka. Dr. Cornelious D. Marak, A·chikkuni chasongoni chasongona dal·roro silrorobaaniko aganangskaaha.
Research scholar-rang Melkior Ch. Sangma aro Gripseng G. Momin, Garo ku·sikna digital literature-ni gamchatani bidingo aganangaha. Uamang manderangko bilingual and multilingual digital project-rango bakko ra·china didiangaha. Indake dakanichi mikrakaniko on·an baksana Garo ku·ko ripingnagita man·gen aro niam retiko tarigipa policy maker-rangnaba skidapaniko on·gen ine uamang janapangaha. Maniani bako research scholar-rang, chatro chatrirang aro gipin sokbagiparang an·tangtangni segimin ming 20-na bate poedorangkoba jinmana mesokangaha.
