South West Garo Hills, Boldamgre songo skanggipa Urban Health & Wellness Centre (UHWC) ko da·al salo Mahendraganj-ni MLA Sanjay A Sangma oprake on·angaha. Program-ona Zikzak C&RD Block-ni BDO Digonto Hajong, DMHO Dr. H. Barman, Boldamgre-ni Nokma, medical department-o kam ka·giparang, health official-rang, VHC member-rang aro songni nokni manderang sokbatokaha.
Ia somoini bako mongsonggipa sokgipa MLA Sanjay Sangma, “Eat Right, Eat Healthy” program-koba a·bachengate on·angaha. Ian dingtang mancha cha·ani ringanio namgipa ranta ka·aniko ja·rikatna, unbaksana National Health Program-rango aro medicial department-rangni tom·anirango namgipa nutrition gnanggipa cha·anirangko on·a didiani ong·a.
Sangma tom·anio aganengon, medical department-o kam ka·gipa dolrangko uamangni namgipa kamrangna demittelangaha. Ua Boldamgre songon atchigipa ong·e bilsi 45-na skang sanna bannaniko ra·na Mankachar hospital-ona re·rurana nangenba neng·nikanirangko chagrongani bidingo janapangjolaha. Ua ia centre-o gital rimnapa man·gipa staff-rangkoba songni manderang baksa name nirok simsake dangdike on·china aro district health dol baksa meli nangrime kam ka·china didiangaha.
Ia Urban Health & Wellness Centre-ko Boldamgre songni manderangna aro wilwilao donggiparangna sepangbate aro altuabate sanna bannaniko on·a ra·baaha. Ian sima-ari jolrango aro songadamrango sanna bannaniko bilakbatatna aro rika cho·aniko bariatna sorkarini kam ka·enggipaba ong·a.
