A·dokni ge·anti constituency rango rakbate kam ka·na aro namdapatna miksonganiko National People’s Party (NPP) ni National President aro Chief Minister Conrad Sangma Budbar attamo parakataha. Ian Khasi aro Jaintia Hills ni Autonomous District Council (ADC) election-ni result in bidingo sing·anina Sangma aganchakangaha.
Manderangni an·tangtangni namnikgipa dilgiparangko seokaniko chinga name daken ra·chakaha. Sorkarinigita pilak constituency rango maikai kamrangko namdapatna nanganirangko chinga ta·raken chanchirimaniko dakanggen ine aganan baksana JHADC-o EC ko rikna man·anian chingna rasong chabeani ong·a ine Sangma aganangaha.
NPP ge·sa A·chik rangni party sa ong·a ine sing·anina, indake ong·genchimode batanggimin election rango Garo Hills ni constituency ong·gijagiparang jekai Ri-Bhoi aro Khasi Hills ni constituency rango maikai chenagita man·angskaaha ine Sangma sing·doangskaaha. Unbaksana ia agangipa kattarang kakket ong·genchimode JHADC-o da·o gitalgipa EC koba rikna man·ani ong·jachim ineba Sangma aganangaha.
Mikkangchi maikai party ko namdapatna aro bilakdapatna nanganiko dingtang mancha grassroot-ni manderang baksa golpogrike uamangni nangnikanirangko u·ie ma·sie ra·e nangchongmotgipa kamrangko ka·na nanganiko Sangma janapangaha. Ian dingtang mancha nangchongmotgipa development ni kamrangko aro songsalo neng·nikenggipa manderangni nangnikaniko ra·bana miksonganiko skanggipao done ka·angna nanggen ineba Sangma aganangaha.
