South West Garo Hillls, Ampati Civil Hospital-ni Medical Officer ine dakmike bang·a manderangoniko tangka paisarangko togie ra·anina Hirak Sangma-ni kosako saksa social activist Greneth M Sangma, Baghmara Sardar Police Station-ni Officer in-charge-na FIR ka·angaha.
Hirak Sangma an·tangko doctor ine agane saksa Silgrimchi R Marak-na Chokpot CHC-o kamko on·gen ine tangkako biani sakki whatsapp-o golpogrikanirangko knaanio chaboke cha·gipa mandesa ine ma·sina man·aha.
Una agreba Hirak Sangma an·tangni whatsapp status-o Dalu aro Chokpot Hospital-o ANM, peon aro cleaner-ni kamrangna biap donganio class X aro class XII pass ka·giparangna dorgasto galna u·iatangaha. Ian kamrangko sandie dongenggipa manderangko tol·napna jotton ka·aniko tale ma·sina man·aha.
Iasan ong·aigija ua battanggimin salrangoba adita gipin manderangonikoba kamrangko on·a ku·rachake tangka paisarangko kragija dake bianirang social media-rango giproroaniko niksona gita man·angaha.
Indake tol·pinike manderangoniko tangka cha·bokgipaoni naljokatna ta·rake am·sandianirangko dake Hirak Sangma-ni kosako kragipa sastirangko on·china Greneth Sangma Officer in-charge-o mol·molangaha.
