District council-ni election-o Voice of People Party (VPP) dolni tang·doaniko MDA sorkarini pilaknigita chu·sokna man·gijani a·selo ong·aha ine Dr. Mukul Sangma aganangaha.
Ia chango bang·bata chadamberang VPP dolna pu·onangtokaha. Ian sorkarini kamrangko uamangna bikote on·a man·jani gimin suk ong·tokgijaniko chadamberang parakangaha. Bangbang donggipa kamrangko sorkari gapatjaha, somoigita kam ka·jaha aro hajalni hajal kamrangko indin donaha ine Sangma aganangkuaha.
Iasan ong·gija election-ni somoirang an·tangtangni dolko cheatnagita sorkarini bang·a gam aro bilrangko jakkalsretaha ineba Sangma aganangaha. Indakgipa a·selrangko sorkariko rikenggipa party-ni dilgiparang u·ina nanga aro uamangni daitotangko ka·gijaniko manderangba gisik ra·atna nanga. NPP dol sorkari nokgipa ong·genchimoba ia chang MDC election-ni result-rangko niaton VPP dolni tang·dobaaniko mesoka ine Dr. Mukul Sangma agandapangaha.
