Walkamgre Khatuli songoniko niam gri bolrangko salangenggipa gipin jatrangko re·anggipa February 27 tariko NGO dolrang rim·aha. Sing·sandianiko dakon uamango maming licence-rang donggijaniko u·ina man·aha aro an·tangarisa bolrangko badingsrukanganiko rim·a man·aha.
Koborrangko man·anigitade ia gipin jatrang salantian bolrangko badingsrukenga aro permit donggija niamni a·palo cha·ue ra·angenga ine NGO dolrang parakataha. Manderangni janapatako man·e NGO dolbri chong·motan GSMC, GSU, AYWO aro APA dolrang nirikina a·bachengaha. Uamang ia manderangko February 27 pring 4 bajimangosa Kalaichar songoniko rim·rikna man·aha aro a·damon gari baksa bolrangkoba sekaha ine NGO dolrang parakataha.
SWGH Boldamgre unit-ni dilgiparangni sing·sandianiko dakon licence-rang dongja baksana a·a nokgipani maming u·iani gri bolrangko cha·uesa ra·angenga ine rim·a man·giparang ku·chakaha. Uamangoni saksade jokna cholko man·enba kate chakaha ineba NGO dolrang parakataha.
NGO-rangni u·iatanigita Garo Hills-oniko bolrangko badingsrukanirang changsa ba changgnisan ong·aigija bang·a changon srik srik cha·urongenga ine janapataha. Indakgipa manderangko da·alsan ong·aigija jringnan nirikianiko dake am·sandianiko dakangkugen ineba SWGH zone-ni dolbri NGO dilgiparang aganangaha.
