South Garo Hills-ni MLA-rang Guwahati-Mendipathar-Baghmara aro Bangladesh a·songni Dhaka songjinmaona rel ramarangko baridapate on·china Chief Minister Conrad Sangma-na memorandum-ko on·angaha. Ia rel ramako Baghmara-oni Bangladesh Dhaka-ona baridapatanichi Meghalaya a·doknasan ong·aigija Northeast-ni gipin a·dokrangnaba a·song gipin baksa bading chiwalgrikanio namgni ong·gen ine MLA-rang aganangaha.
Baghmara aro Mymensing damgnini sima ario ong·e, India aro Bangladesh a·songni gisepo rel ramako tarianio sepangbatgipa ong·enga. Indake bading chiwalgrike cha·anio, tourism, skia pora aro a·song ge·sa ge·gipinni daka rikanio tang·doaniko ra·bagen ine MLA-rang chittio janapangaha.
India a·song jakgitel ong·na skangde ia a·song damgnini gisepgriko bading chiwalgrikaniko dakrongani gimin rel ramarangko baridapate on·genchimode bading chiwalanioba bilakdapatna namgipa chol ong·gen ineba aganangaha. Baghmara songjinma Bangladesh a·songni sima ario donggipa simsang chibimani rikamo ong·e Meghalaya a·doko bading chiwale cha·anioba damsa mongsonggipa biap ong·a ni gimin Baghmara-o Integrated Check Post (ICP)-ko songanichi gipin a·songoni re·ruraenggipa aro bosturangko salruraanirangkoba nambate nirok simsakaniko dakna man·gen ine MLA-rang aganangaha.
Bangladesh oni Baghmara-ona sepangbatgipa railway station-ara Mymensing Division-o donggipa Jaria Railway Station ong·engani gimin ia rel ramako Baghmara-oni Jaria-ona tarie on·genchimode a·song damgnini gisepo re·a doani, bading chiwalgrikani aro pilak kamrangna nengrabatgen ineba SGH-ni dilgiparang chittio janapangaha.
Baghmara oni Dhaka-ona rel ramako tarianggenchimode SAARC, BIMSTEC, ASEAN aro Indo-Pacific a·songrang baksa a·gilsak gimikni tourism-o bakrimaniko bilakdapatna chol ong·gen. Iani bidingo National Railway Development Plan-o man·chapatchina Railway Ministry baksa agangrikchina Chief Minister Conrad Sangma-ko mol·molangaha.
