Sorkarini kamrangko manderangona altubate ra·bana man·agita aro bang·a neng·nikanirangko olgrokatna manchie Integrated Administration Complex ko Tura, Jowai aro Pynursla-o rikatenga ine Chief Minister Conrad Sangma Bristibar salni Assembly session-o parakangaha.
Ian Leader of Opposition Dr. Mukul Sangma ni Tura-o Winter Capital ni bidingo resolution ko ra·baani ja·mano Chief Minister adita talate on·angaha.
Garo Hills ni manderang km 300 na bate songree porikkarangko sena ba office ni dingtang dingtang kamrangna re·na nangaoni naljokatnagita ia gitalgipa Integrated Administration Complex ko gong 170 crore ko chamate Tura aro a·dokni damgni biaprango rikatenga ine Sangma parakangaha. Ian batanggimin somoio Mini Secretariat ko rikna gong 25 ko chamatahachim, indiomangba manderangna nambata gadangni office ko aro neng·nikanirangko olgrokatna miksonge Integrated Administration Complex ona tang·doatskana kamrangko ka·angaha ine Chief Minister agandapangaha.
Una agreba Tura-o Governor House ko sorkarini matchote rikataniba Garo Hills ni manderangni nangnikaniko ma·siesa sorkari kamrangko ka·angaha ine Sangma talatangaha. Unbaksana Garo Hills ni manderangnasan ong·aigija a·dokni gipin biaprang jekai Jaintia Hills aro Khasi Hills ni manderangni neng·nikanirangko nirokatna, porikka seani centre rangko Tura, Jowai aro gipin biaprangona ra·banaba sorkari kamrangko ka·angaha ineba Sangma agandapangaha.
Ia pilak talatanirangko Chief Minister ni on·ani ja·mano Dr. Mukul Sangma uni chanchiagita aro resolution-o janapbagipako Chief Minister name mancha ma·sien kam ka·engenganiko nike uni kusi ong·aniko parakange, Dr. Mukul uni ra·bagimin resolution ko ra·pilna ku·rachakangaha.
