Tura-ko winter capital songna Garo Hills-ni nangnike dabienggipako nipilchina Dr. Mukul Sangma-ni resolution-ko on·ani ja·mano Chief Minister Conrad Sangma, committee-ko bosaie on·a tik ka·angaha. Chief Minister-ni resolution-ko ra·pilchina mol·molahaon Dr. Mukul Sangma ra·pilaha aro assembly-oba iako ra·chakangtokaha.
Indake ong·genchimoba Conrad Sangma, Tura-ko winter capital dakaniko name dake niangna committee-ko songna parakaha jeon bang·a political party-rangni dilgiparang, unbaksana Garo, Khasi aro Jaintia Hills jatgittamni manderang donggen ine aganangaha.
Session-ni ja·mano winter capital-ko dakani bidingo koros nanganirangko janape sing·on, rika cho·aniko dakna korosrang nanggenchimoba manderangna chu·gimik aro apsan rimchimonge kam ka·anian gamchatbatgipa ong·enga ine Sangma aganangaha. Rika cho·aniko dakna jekai Tura-o Integrated Administrative Complex aro uandake gipin kamrangko ka·na korosrangko nanggen ineba Sangma agandapangaha.
