West Garo Hills, Jengjal Baljek airport-ko 2008 bilsionin nokdongae da·onaba chalaina man·jaenganina Dadenggre constituency-ni MLA Rupa Marak da·alo budget session-ni question hour-o sing·doangaha.
Deputy Chief Minister Sniawbhalang Dhar, ja·manchakani mongsonggipa ja·pangko a·arang nangdapani bidingo ong·enga ine singa·nina aganchakaha. Airport Authority of India (AAI), runway-ko dal·dapatna aro dal·bata sildorengko chokonatna skanggipa 58 acre a·ako bi·aha jekon a·dok sorkari ra·chakaha. 2020 bilsio, name dake porikka ra·e nitaienba chalaianio naljokanina niamgita runway-ko dal·dapatna nangengkuani gimin AAI chang·satai 60 acre a·ako bi·dapangaha ine Dhar aganangkuaha.
Baljek airport-na chu·ongagita a·a nanganiko ma·sina AAI-ko a·dok sorkari baksa re·baenba joint inspection ba apsan nirokechina mol·molataniko Dhar parakangaha. AAI-ni re·mikkangna chinko on·ani ja·mano airport-ko dal·dapatani kamrangko ka·anggen ine ua aganangaha. Unbaksana, bang·bata airport operator-rangan sildoreng chonako chalaina gongkalja ine Dhar agandapangaha.
Chief Minister Conrad Sangma, iani bidingo bang·a neng·nikanirang donggenchimoba jringnan agan golpogrikanirangko dakenganiko u·iatangaha. Dingtang dingtang neng·nikanirang jekai chalaianio jajrenganirang, tangka paisa nanganirang aro una agreba AAI sorkarini kosako bang·a sing·doanirangko dakaha. Changni chang AAI baksa golpoanirangko dakenba da·o ia kam bon·chota gadangona sokaha aro re·baenggipa 2026-ni gisepo Baljek airport-ni kamrangko matchotna jotton ka·gen ine Sangma talatangaha. Air Alliance baksa golpogrikaniko aro uamangni bakrimna kusi ong·anikoba Sangma parakangjolaha.
