SGH a·jani MLA-rangni rel ramarangko Baghmara-ona baridapatna nangnikaniko parakatani bidingo A·chik Holistic Awakening Movement (AHAM) Southern Zone dol DC-na chittiko on·angaha. Rel ramarangko ra·baanichi tang·doaniko ra·bana man·a aro ia kamni kosaka chinga jegalenga ong·ja indioba maming simsaksoani donggija rel ramarangko da·o tariode Garo Hills-o songdongkamgipa manderangna bang·a neng·nikaniko ra·bagen ine AHAM parakataha.
Mongsonggipa a·selko uamang a·palchini niamgri India a·songona napsrukbagipa batroroenganiko janapataha. Indake a·palchini bang·e napsrukbaaniko champengsonagita Meghalaya a·dok dingtang mancha tarisamsoa dongkuja ine AHAM parakataha. Simsaksoani dongjae Garo Hills-ni bakrango napsrukbagiparang batroroengaha jeon songdongkamgipa gipin jatrang bang·batroroaniko, niamgri a·arangko a·kangani aro bading chiwalanio A·chikrangni kosako ganggopaniko nikna man·enganiko AHAM aganangaha. Rel ramarangko baridapataniara niamgri napsrukgiparangna altua cholguga ong·gen ineba uamang u·iataha.
Sima ario ong·pae aro da·o simsakani bilakgijaniko nike Baghmara-ni manderang an·tangtangni a·a chia, gam-jinrangko aro daka rika bebe ra·aniko gimaatna kenaniko AHAM parakataha. Rel ramako tariana bate bilsi 53-na galchipe dongipa NH-217 ramako tarake tarie on·china aro chu·gimik tang·doanina kam ka·china uamang agnangskaaha. Iasan ong·aigija gipin a·barango jekai sanna bannani, skia pora, nambata rama, dolongrang aro rika cho·oni gipin kamrang, chadamberangna kamrangko bikote on·china aro janggi tangani cholrangko ra·bae on·skachinaba AHAM dol janapataha.
