Chief Minister Conrad Sangma, assembly-ni somoio budget-ni bidingo general discussion-o sing·anina aganchakengon, Meghalaya-ni salsa batroro tang·dobaaniara loan ra·anichi ong·ja a·dokni gamjinko jakkale cholrangko baridapatanichisa ong·a ine aganangaha. Tangka paisa ra·sroanio national average aro chu·gimik receipt baksa nigriko 19% ong·enga jean 12% oni adita kosakosan ong·a ine Sangma parakangaha.
Meghalaya-ni namdaproroaniko loan-rang ra·aniosan pangchakaha aro grorangko manderang chotpilna nangani kattarangko agananiara songdonggiparangni kosako ong·gija ma·sisretanisa ong·aniko Sangma aganangaha. Re·anggipa 2017-2018 bilsirangoni dipet a·dokni budget chang gittam dake baridapaha. Ua somoirango a·dokni budget gong 9,858 crore ong·aoni da·o 2024-2025 bilsiona gong 27, 072 crore ong·aha ine Sangma u·iatangaha.
A·dokko 10 billion dollar economy-ona 2028 bilsio sokdonagita gong 85,787 crore mang Gross State Domestic Product (GSDP) ko man·a re·mikkangenganiko Sangma janapaha. 2014-2018 financial year-o 6.5% GSDP mangona tang·doaha aro 2019-oni 2023-2024 bilsiona 10.5% mang sokdoangskaaha ine Sangma parakangaha. 2026 bilsio 13.5 tang·dona ka·dongsoenga aro indake gadororoanian gong 85,787 crore GSDP-ona sokatgen ine Sangma aganangkuaha.
2018-26 bisliona revenue expenditure 10.4% ona sokdoaha jeon capital expenditure 23.8% ong·skaa. Ian capital expenditure-o bang·bate tangkarangko jakkalna donaniko mesoka. Ma·mongna kajina gamna nanggiparang a·dokni tangka ong·ja indioba ma·mong sorkarini on·gipasa jekon niam bidiko dongimingita ia tangkarangko ma·mong gipin a·dokrangna aro Meghalaya-na sualatna nanga ine Sangma agandapangaha.
