Meghalaya a·dokko 2028 bilsini gisepo crore 85,787 jean USD 10 billion ni Gross State Domestic Product (GSDP) ona sokatna manchie kam ka·anirang miksongagitan ong·angenga ine Chief Minister Conrad Sangma Sombar salo parakangaha.
Iako chu·sokatna sorkari dingtang dingtang project rangna tangka paisarangko chamatmangmangaigija manderangna kamrangko bikotani cholko ra·bana miksongesa ja·ku de·angenga ine Sangma aganangaha. Ian sorkarini scheme, rika cho·anio aro private sector rango pangchake 2028 bilsini gisepo lakh bonga kamrangko bikote on·a kamko ka·angenga ineba parakataha. A·dokni budget ba man·gnirang 2017-18 o crore 9,858 oni crore 27,072 ona 2024-25 bilsio tang·doaniko nikna man·aha ine CM parakangaha.
Indakgipa gadango ia budget ni tang·doanian Meghalaya a·dokko develop ong·atna aro economy ko bariatna kam ka·aniko mesokenga ine CM aganangaha. Meghalaya ni tangka man·ani cholrang 2017-18 o crore 1,817 oni crore 4,041 ona 2024-25 bilsio tang·dodapaniko nikangna man·aha ineba janapangaha.
Sorkari dingtang mancha rika cho∙anirangko namdapataniko skanggipao done a∙dokni kona noksikni songrangko galchanggija kamrangko sokatna manchie, re∙anggipa bilsi 7 ni gisepo rama jal∙angrangko namdapatna crore 4,000 mangnigita tangka paisarangko ia sorkari chamataha jean batanggipa bilsi 30 rango chamatgipa crore 659 na baten indita tang∙doaniko nikna man∙angaha ine CM talatangaha.
Iasan ong∙aigija pora skiani gadangko namdapatna Mission Education nigita ge 2,611 skul rangko taridapna sorkari kamrangko ka∙angan baksana dingtang dingtang administrative aro sanna bannani biaprangko namdapatnaba ia sorkari ja∙kurangko de∙angenga. Kamrangko bikotani cholrangko bikotnagitaba entrepreneur, bading chiwalgiparangna aro gipin cholrangko skie ra∙e tangka paisa kamaina Self Help Group (SHG) aro tourism ni a∙bao kamrangko ka∙e cha∙naba sorkari kamko ka∙angaha ine janapangaha.
Una agreba IT sector ko tang∙doatna nangchongmotaniko aganengon, Shillong Tech Park Phase I & II aro Tura Tech Park ko ra∙baanichi mikkangchi ge 22,000 kamrangko bikotna dakchakanggen ineba Sangma parakangaha. Bijoli wataniko namdapatna adita ja∙kurangko de∙ange Aggregate Technical & Commercial (AT&C) loss ko 32% oni 17% ona tang∙onatna man∙anikoba parakataha.
Baikamgipa bewalrangko jakkale CM FARM+ program ko a∙bachengatanichi 22,916 hectare a∙arango ge∙a gamanirangko songadamrango nambatatna dakchakangan baksana ge 71,436 kamrangko nakatatna cholrangko on∙anggen ine CM talatangaha. Songadamo kamrangko bikote on∙aniko baridapatna gamgimin bite rangoniko bostu tariani cholko ra∙bana processing unit rangko ra∙baanichi 2028 bilsini gisepo ge 75,936 kamrangko bikotna miksonganikoba parakangaha. Iana agreba sorkari bang∙a ja∙kurangko de∙angenga aro Meghalaya ko 2028 bilsio crore 85,787 ni economy ona tang∙doatna manchianiko Sangma aganangaha.
