Leader of Opposition (LO), Dr. Mukul Sangma, chu dokanrangko dakna licence-rangko on·aniko dontongchina sorkariko aganangaha. Rama sepangrango chu dokanrangko dakna on·anina ua namnikgijaniko parakaha aro maikai dingtang dingtang gadango chuko palenggiparangna licence-rangko pakwatenga ine Sangma sing·doangaha.
Licence-rangko nangana batpile on·anichi nadobaenggipa gital chadambe entrepreneur-rangko sorkari aro department ja·guatenga. Nokdangko rikna ske, poraia matchotmanahaon saniba didianiko man·e aro gipinni chu·sokaniko nikenba man·gnirangna rike bon·chongdikenga ine Sangma aganangaha. Da·o niatgenchimode rama samtangtangon silsile tarigipa chu dokanrang bilongen bang·aha jekon dal·dalgipa fashion designer house-rang baksa susaagita nikangpila ine ua aganangkuaha. Sakantian dorgastoko galenga aro apsandaken pilaknan licence-rangkoba on·enga, niam retirang bao ine Sangma sing·doangaha.
Chu dokanrang bang·roroengahani gimin nokgiparang licence tangkon renew ka·na aro dokan paramangkoba gamnan tangkarang dongjaengaha. Ian churangko palnangjani a·sel ong·a maina ge 5 dokan dongna nanggipani palo ge 15 dokanrang dongskaaha ine ua aganangaha. Maidakgipa a·selni gimin sorkari licence-rangko on·dapdapkuenga, Sangma sing·doaha. Wine store nangani dongosa ge·gipinko rikna licence-ko on·a nanga, ua aganangkuaha.
Bar-rangko chalaienggiparang aro dokanrango ra·na re·bagiparangni bilsirangko niroknagita niamrangko tarina nanga. Me·gong festival-o, jakra jakasi chu·rangko palaha, a·daman bar-gita chacha dakpilaniko Sangma parakaha. Chadambe bilsi chu·onggijarang nape pekgipa bosturangko jakkalaniko nikna man·aha.
Iani bidingo Sangma ning·tuaniko parake da·o dipetoni chu dokan kulina licence-rangko on·aniko dontongna sorkariko aganangaha.
