Sukrobar sal, March 14 tariko South West Garo Hills, Nogorpara ni Katta Beel-o Meghalaya sorkarini Department of Arts and Culture aro North East Zone Cultural Centre (NEZCC) Dimapur baksa apsan bakrime Border Area Programme ko ong·atangaha.
Ia programme ko maniani miksonganiara India a·songni jatrangni dakbewal rikbewal rangko aro changa sapaniko mesoka gita ong·a. Ia programme ni gita Indo-Bangladesh sima ari jolo songdonggiparang aro Nogorpara songrangni re·bae bak ra·angtokaha.
Meghalaya, Chhattisgarh, Nagaland aro Assam a·dokrangni chrok mesaani aro gipin changa sapani rangkoba ia tom·anio mesokangtokaha. Ia tom·anio adita jatrangni chrok mesaanirangko mesokangaha jekai Meghalaya a·dokni A·chikrang Wangalangaha, Koch jatrangni Hoko chrokani, Assam a·dokni Bihu, Chattisgarh ni Ditong Endana ba Gedi chrokani aro Nagaland ni Sumi jatrangba jattangni chrokaniko mesokangaha.
Border Area Programme ara Bharat ko Jano (Know India) ba India ko ma·sibo ingipa katta bichongko done, India a·songni dingtang dingtang jatrangni dakbewal rikbewal rangko ma·sie ra·an baksana saksa sakgipinko de·doani ong·a. Dingtang dingtang jat rangko rimbae bakko ra·ate saksa sakgipin ni dingtanggrikani ra·chakani gitaba ia programme ko ong·ataha.
Ia programme ko apsan ku·mong nangrime dongchina aro jattangni daka rika ko name dake rakkichina gimiknan u·iataniko on·angaha.
