West Garo Hills, Batabari Baptist Gilja nokni bika 7 a·a jean Nawalgre Nokma a·kingo ga·akgipao gipin jatrangni niamgri songdongenganiko nirokatchina Garo State Movement Committee (GSMC) aro All A·chik Youth Federation (AAYF) dolrang GHADC-ko mol·molataha.
Ia biapo wachini somoio chi bana ong·miting somoio nokgri jamgri ong·e neng·nikanirangko man·giparangna relief camp dake dongchakna gita re·baaha. Chi bana namani ja·manoba ia biapo songdonggipa gipin jatrang re·angpilani pal batesa songdong a·chae dongskaaha ine NGO dolrang aganangaha.
Gipin jatrangni songdongenganiko kobor man·e adita giljani manderangni re·ange nianiko dakon bang·bea gipin jatrangni songdongenganiko nike Garo Hills Autonomous District Council (GHADC)-na badi ka·doangaha. Indake uamangni niamgri re·bae songdongani ja·pang rangko District Council nigita am·sandianiko dakanio 2007 bilsini July 30 tariko nok te 8 rangna gipin biapona jitchina ge·etangaha. Uni ja·manba District Council-ni changni chang uamangko ua biaponi jitchina u·iatani rangko on·taitaigenchimoba da·alona kingkingba ua biapo gipin jatrangni songdong a·chae donganiko nikna man·engkua ine NGO dolrang aganangaha.
2025 bilsini March 17 tariko Halidayganj-ni police-rang, GHADC-ni Officer-rang baksana dingtang dingtang NGO-ni dilgiparang nangrime sing·sandianiko daktaion nok te 24 rangni gita baridapaniko nikna man·aha. Unbaksana Batabari gilja nokni a·aon nok 5 rangni gitade Mouza No. 6-o pangchake a·a pattarangko tarimanani sakkirangko man·aha ine NGO dolrang aganangaha.
Nokma A·king ba Batabari gilja-ni a·ani kosako Mouza No. 6 o pangchake gipin jatrangni tol·e a·a patta tarigiparangko ta·raken Indian Constitution-ni Sixth Schedule-ni bilo aro GHADC-ni niamo pangchake dengale gale rikgalchina NGO dolrang GHADC-ni dilgiparangko mol·molangaha.
