National Green Tribunal (NGT) ni beng·aniko man·e, rathole ba chonchongipa a·kolrangko cho·e koela bikotaniko dontongani bilsi 10 ja·mano Meghalaya-o scientific mining-ko Saryngkham East Jaintia Hills-o a·bachengataha. Ian Meghalaya a·doko skanggipa Scientific Mining Coal Block ong·a jekon EJH Byndihati-o program-ko ong·atenba video conference ka·e Chief Minister Conrad Sangma-chi oprakate on·angaha.
Conrad Sangma, uni agananio gipin dorgasto galgiparangna apsangrik permission-rangko on·e niamgita koela bikotaniko a·bachengatengjok ine aganangaha. Scientific mining-ko dakanichi kamrangko altuatan baksana niamko ja·rike koela bikotani namgipa ramako manderangna mikkangchina mesokani ong·a ine Sangma aganangkuaha.
Meghalaya-o neng·nikanirang bang·a, jekai technology-osan ong·aigija a·arango bil dongani aro a·kanganirang a·songni gipin bakrangming namen dingtanga. Iani a·selon dingtang tarisamsoanirangko dakna nangaha aro gital neng·nikanirang sokbaaha. Uni gimin ia scientific mining-ko chu·sokatna chanchisoana baten somoi nangaha ine Sangma aganangaha.
Sutnga Saipung MLA, Santa Mary Shylla, Chief Minister-ni dilanichi ia dal·gipa kam chu·sokna man·aha ine aganangaha. Meghalaya-o scientific mining-ko a·bachengna man·ani ia sorkarini ning·o kakket ong·aha aro mikkangchiba uni dilanion Meghalaya-ko 10 Billion $ economy-ona sokdoani jumang bimang ong·na man·gen ine Shylla uni ka·dongsoaniko parakangaha. Program-o gipin sokbagipa dal·dalgipa manderangba aganangaha.
