Da∙al salni bako South West Garo Hills ni Office of the District Statistical Officer, Ampati ni Multi-Facility Centre-o salsana District Level Sensitization Programme ko ong∙atangaha.
Ma∙mong sorkarini Ministry of Statistics & Program Implementation ni ning∙o ong∙gipa jean Support for Statistical Strengtheneing (SSS) scheme nigita ia program ko u∙iatani, pora skiani aro agan golpogrikani bak ba kamrango pangchake ong∙ataha.
Indakgipa program rangko ong∙atanichi game ge∙e cha∙ani aro dam dakani gamchatani gimin mikrataniko seokgimin Village Employment Council (VEC) ni secretary, songni sordar aro game cha∙giparangna u∙iataniko on∙a miksonge ong∙ataha. Ia program dingtang mancha ge∙gimin bosturangni ni gimin see rakkie donani, jakkalgimin a∙a ni gimin u∙ie ra∙na aro damrangni gimin talatna dakchakani ong∙a jean songsalo nanggipa niam rangko ra∙gatna aro namgnirangko ra∙bana dakchakani ong∙anggen.
South West Garo Hills ni Additional Deputy Commissioner (MCS), Dolrich B.G. Momin mongsonge sokgipa ong∙e indakgipa program ni gamchataniko aganangaha aro a∙songko silroro namroroatna mandeskana dakchakgrikachisa chu∙sokatna man∙a ineba ua agandapangaha.
District Statistical Officer Sanang G. Momin, re∙bagipa sakantiko rimchaksoani kattarangko aganangaha aro DES Shillong ni Research Officer B.G. Momin Crop Cutting Experiment ni gimin talatangan baksana ge∙a gamani aro dam dakanio statistics ni gamchataniko aganangaha. DES Shillong ni Research Officer D.T.N Sangma dam dakani statistics aro Consumer Price Index (CPI) ni gamchataniko talatangaha.
Ia program-o bak ra∙giparang dingtang mancha ge∙a gamani a∙bao u∙igiparang baksa agangolpogrikna cholko man∙e uamangni ma∙sina nanggiparangko sing∙na gita cholko man∙angaha aro game cha∙anio maikai statistics ni gamchatani bidingoba adita talatanirangko man∙angaha.
