Meghalaya a∙dokni Byrnihat songjinmako adita salrangna skang Central Pollution Control Board ni gita pollution level ba balwa rongtaljani batroroenga ine parakatani gisepo a∙dok sorkari ia obosta rangko nirokatchina Meghalaya State Pollution Control Board ko ge∙etange Byrnihat o donggipa karkanarangko audit ba porikka ra∙e salsni ni gisepo a∙dok sorkarina reportrangko sokatchina u·iatangaha.
Iani bidingo a∙dok ni Chief Minister Conrad Sangma, Forest aro Environment Department ni officialrang baksa chanchirime Meghalaya State Pollution Control Board ko Meghalaya chi pak donggipa karkana kakket ko audit ka·e nirokatchina ge∙etangaha ine Forest and Environment ni Commissioner & Secretary Pravin Bakshi aganangaha.
Assembly ni budget session-o Byrnnihat ni karkani rangni a∙sel balwarangko moila ka·anichi India a∙songosan ong∙aigija a·gilsak gimiko toate ia songjinmakon rongtalbatsranggija biap ine bimungko donangako man·e, Assam aro Meghalaya a∙dok apsan ja∙ku de∙e kam ka∙na nanganiko Chief Minister Conrad Sangma aganangaha.
Byrnihat songjinmao donggipa karkanarangni gisepo Assam a∙doko donggipa karkanarangni rongtalgijagipa balwarangko watatnina red category ba simsakna nanggipa gadangona sokdoaha ine u·ina man·aha. Ia pilakon nirokatna aro balwa rongtalgijaniko komiatna ta∙rake ja∙ku de∙na nangengani gimin Assam a∙dok ni Chief Minister baksa apsan bakrime kam ka∙na gita Sangma chitti-o see mol∙molangaha.
Assam Pollution Control Board karkana rangona re·ange nirokna aro audit ka·na a∙bachengatangaha aro apsan somoion Meghalaya a∙dok ba Byrnihat ni rongtalgijaniko nike nipiltaianiko dake kam ka∙anggen ine Bakshi agandapangaha.
