EGH Williamnagar songjinmao, United A∙chik Socio-Economic Justice Forum (UASEJF), Williamnagar Police thanao District Sericulture Officer S. G Momin, bak donggipa contractor rang aro Meghalaya Government Construction Corporation (MGCC) ni kosako badi ka·doangaha.
Badi ka·anio segatanigitade uamang 2020-2021 aro 2021-2022 Rashtriya Krishi Vikas Yojana (RKVY) ni scheme-rangniko tangkarangko jakkalsretaha aro kam matchotgija ka·aha ine u·iataha. District officer-ko uamang matchotani certificate-ko togie on·a ine matnangataha jean contractor aro MGCC-na tangkarangko okna cholko on·aha. Ia scheme ko “Extension of Muga Plantation and Strengthening of Pilot Extension Centre for Producing Seed Coon at Samanda Farm” ine bichongko done gong 1.2 cr ni tangkarangko chamataha.
RTI ka·on dingtang dingtang kamrang jekai Grainage House Construction gong 48.84 lakh, bijoli salna gong 5 lakh, water supply gong 28 lakh, boundary wall aro fencing ka·na gong 38.25 tangkarangko bak dake tikataniko u·ina man·aha. Tangkarangko okmanahaoba kamrangko matchotgija aro namgija ka·aha, nalarang aro chi tank-koba name tarijaha ine UASEJF parakataha. Uni gimin ia manderangni kosako Bharatiya Nyaya Sanhita (BNS) aro Prevention of Corruption Act-o dongimin niamranggita raka sastiko on·china uamang police-rangko didiataha.
