South West Garo Hills, Garobadha petrol pump-ko chalaienggipa Askar Ali Sheikh-ni Trading by Non-Tribal (TNT) license-ko niamgita ong·gija man·anina A·chik State Peoples’ Front (ASPF) dolrang badi ka·doangaha.
Indake niamni a·palo TNT license-ko man·anian kenchakani aro jajrengna nanganiba ong·enga maina ian Garo Hills Autonomous District Council (GHADC) ni dongimin niamni kosako dakdraani ong·enga ine aganangaha.
Trading by Non-Tribal (TNT) license, ian GHADC-ni dongimin niamni ning·ao ga·akgipa ong·a. Ian maming dakeba tribal manderangni kamaiani cholrangko gimaatgija Garo Hills-o songdongenggipa gipin jatrangna license-rangko on·a GHADC aro a·dok sorkarini dongimin niamo pangchakesa on·ronga ine ASPF dolrang janapangaha.
South Salmara Assam-ni Askar Ali Sheikh-ni chalaienggipa Garobadha petrol pump jekon Ms. Garo Hills Fuel Station ine dongipa license-ko man·aniara dongimin niamrangko ja·rikgija dakdrae ra·ani ong·a ine aganangaha.
Ia pilakon name dake nipiltaie Askar Ali Sheikh-na TNT license-ko on·gipani bidingo aro uni dorgasto galaniko am·sandie nipiltaianiko dakchina GHADC-ko ASPF dolrang mol·molangaha.
