West Garo Hills, Dadenggre kal·chakramo antisa gape ong·atanggipa ‘Bakrim 2025’ jekon sorkarini scheme-rangni bidingo nambate ma·sie ra·na ong·atgipa da·al salo name matchotangaha. Ia program-ona West Garo Hills-ni Deputy Commissioner Jagdish Chelani mongsonggipa sokgipa ong·e bako ra·angaha. Unbaksa, Dadenggre Civil Sub-Division-ni SDO Adiya Verma ,dingtang dingtang department-ni officer-rang aro songdongenggipa manderangba sokbatokaha.
Deputy Commissioner Jagdish Chelani, ia program-ko ong·ate songdongenggipa manderangna sorkarini scheme-rangni bidingo nambate ma·sie ra·na cholrangko on·anina organiser-rangko mittelangaha. Mikkangchi sorkarini scheme-rangko man·engon uarangko name dake jakkalchinaba sokbagipa manderangko DC didiangaha.
Ia program-o dingtang dingtang susagrikani jekai pakmao noksa salani, budu salgrikani, Volleyball, doka dam·an, chrok mesaani aro gipin susaanirangko ong·atangaha. Jaktangchi tarigipa bosturang, me·su samjakrangko mesokani, cha·ani aro kal·anirangko dokanrango pala sim·anikoba dakangaha.
Best Village ba nambatsranggipa songni award-ko Modelgre song man·angaha, rongtalbatsranggipa songni award-ko Damal Asim aro Best Village Employment Council (VEC) ko Sadolpara song man·angskaaha. Ia songrangna Dadenggre Civil Sub-Division-ni gita tangka gong hajal 50 aro hajal 20 ko on·angaha.Ia antisana ong·atgipa program-o Sub-Division-ni dingtang dingtang department-rang sorkarini scheme-rangni namgnirang aro cholrangni bidingo tale skie on·angaha
