World War l-o bak ra·gipa A·chik matgrikrangko gisik ra·na Tura Babupara-o tarie dongipa Cenotaph-ko a·dok sorkarini mijal salo pe·e galani ja·mano opposition dolni jean TMC party-ni MDC-rang da·al salo re·ange nianiko dakangaha.
A·dok sorkarini World War l-o dakchake on·anggipa A·chik matgrikrangko gisik ra·na see rakkigipa cenotaph-ko mande ra·gija pe·e galaniara A·chik pagitchamrangko gisik ra·aniko chonikaniba ong·a ine MDC-rang aganangaha.
Indake A·chik matgrikrangko gisik ra·na rakkie dongipa Cenotaph-ko pe·gijaba ia biap ko nambate tariani chol donggenchimoba indake chu·gimikon pe·e galaniara kragipa ong·ja ine MDC rang jegalangaha. Ia ong·gimin obostani bidingo A·chik jatna kakket bichal-ko ra·bachina, ia kam-o bak donggipa sorkari-ni dilgiparangni kosako nanggipa ja·kuko de·china Chief Minister Conrad Sangma-o MDC-rang mol·molangaha.
