World War I-o bak ra·anggiparangko gisik ra·na Tura Babupara-o tarie dongipa a·damo rika cho·ani kamrangko ka·engani bidingo Tura Municipal Board (TMB) ni Chairman J D. Sangma talatanga. Ia biapo Garo Labour Corps Day-ko manina biaprang chu·ongjaengani gimin dal·dape aro namdape tarina a·bachengenga ine Sangma parakangaha.
Pangna bilsian ia salko manianio bang·a neng·nikanirang jekai traffic-rango apchangketa, gari gorarangko donchakna biap chu·ongja aro manderangna namen re·to dongtojaniko on·aniko Sangma janapangaha. Ia a·damko commercial ba cha·chak ringchakani dokanrangko dakgen ine knagipa kattarangko ua jegalate iano asongchaknagitasa tarina am·enganiko ua parakangaha.
Ia biapko rue galna ba nosto ka·na ong·ja indioba sokbagiparangna apchangketgija manderang bang·bate chaknagita tarienga, Sangma aganangkuaha. Unikoa, garirangko donchakna aro manianio bang·a manderang bak ra·na man·agitasa namdape tarienga ine Sangma aganangaha.
Mijal salo, bang·a NGO dilgiparang, songsalna kam ka·giparang, senior citezen aro gipinrang Deputy Commissioner-ko grongaha. Grongani ja·mano DC ia a·damo kam ka·aniko ta·raken dontongna aganaha aro mikkangchi biapko tarinagita pilak baksa tom·e chanchirimnaba parakangaha.
