A·chik matgrikrangko gisik ra·na Tura Babupara-o tarie dongipa Cenotaph-ko nosto ka·enga aro uno dingtang biaprangko tarina am·enga ine ma·sisretaniko West Garo Hills-ni Deputy Commissioner Jagdish Chelani Bristibar salo talatangaha.
Ia Cenotaph-ko pe·e gale restaurant-ko rikna am·skaenga ine social media-rango giproroanganina ian kakket ong·ja ia Cenotaph-ko nambate taridaptainasa pe·aniko Jagdish Chelani aganangaha. Iani bidingo Mother’s union dolrang baksaba sombar salo agangrikaniko dakmanaha aro ia biapo commercial complex rangko rika choaniko dakjawa ineba agandapangaha.
World War l-o dakgrikgipa matgrikrangko gisik ra·aniko bilsi antian July 16 tariko dakmitingo ia manianiona re·bagipa manderangni garirangko donagita biaprang apchangket ong·e adita traffic jam-rangko ong·ate re·ruraanio neng·nikanirang ong·enga ine Jagdish Chelani aganangaha.
Ia maniani salo mamingba neng·nikanirangko man·janagita ka·magipa floor-ko parking-na, skanggipa floor-ko restaurant aro manderangna niwate ro·na, ia restaurant-ko maniani salosan kulinagita manaigen. A·chik matgrikrangko gisik ra·na tariani Cenotaph-ko kosakbatgipa gadango tariskagen aro ia project-na tangka gong crore 2 tangka paisarangko chamatanikoba Jagdish Chelani aganangaha.
Iana agreba dingtang dingtang dilgiparang baksana committee-rangko songanggen jeon Tura Municipal Board-ni CEO, Garo Autonomous District Council (GHADC), dakgrikanio janggitangko gimaatgipa nokdangrangoniko sakprak, Mother’s union aro Senior Citizens Association-rangni member-rang bak ong·gen.
Cenotaph-ko taridapani bidingo chanchianiko commitee-rang nipiltaianiko dake Urban Affairs Department aro Chief Minister-na name dake nipiltaianiko dakchina on·anggen ine DC Jagdish Chelani aganangaha.
