A·dok sorkarini Tura Babupara-o tarie dongipa Cenotaph-ko mande ra·gija nosto ka·ani ja·mano Congress dolni dilgiparang biap-ona re·ange World War-I o dakgrikanio janggirangko gimaatgipa pagitchamrango aro uamangni nokdangrango kema bi·aniko dakangaha.
A·doko jattangan Chief Minister ong·genchimoba A·chikrangna mikkim rasongko ra·bagipa matgrikrangko gisik ra·na tarie dongipa Cenotaph-ko nosto ka·e galaniara jatko chonikaniko aro watgalaniko nikna man·enga ine Congress-ni dilgiparang aganangaha.
Congress dolrang Tura Municipal Administration-ni Marak aro Deputy Commissioner Jagdish Chelani-ko A·chik jatko chonikani kamko ka·anina uamangni kamrangko ta·raken ra·galchinaba Congress-ni dilgiparang aganangaha.
Ia Cenotaph-ko nosto ka·anina jegalaniko dakgipa Mother’s Union aro NGO-rangna Tura-ni MP Saleng Sangma aro uni dolrang dontonggija chakpaaniko on·aggen ine aganangaha.
A·chik matgrikrango kema bi·aniko dakna gita gitcham Deputy CM aro Congress-ni Working President Deborah Marak, Meghalaya Youth Congress ni President Timjim Momin, Youth Congress ni incharge Sarifa, gitcham MLA Ferline Sangma, gitcham MLA Brigady Marak aro Tura-ni adita dilgiparang biapona re·ange mande ra·aniko dakangaha.
