West Garo Hills, Damal A·sim police thanani ning·o man·gipa Dananggre Songma songo rim·sruka man·gipa matchu badinggipako police dolrang denggu dakgipa manderangoniko naljoke rimbapilna man·aha. Police-rang baksa chagronggrikao saksa rim·srukanio jak donggipa goa man·e siaha, aro gipin sakgniko police dolrang rim·aha. Uamangoni saksa, Garo Hills-o gitcham bobil dake chakatgipa ASAK doloni ong·a aro ru·utgija somoirang skangsa bail-o Tura pattokoni jokaha ine u·iataha.
Ia obostani bidingo March 20 tariko Ruvi Hussain-ko rim·srukani bidingo depante Rasik Hussain Damal A·sim police thanao mokor domako segataha. Uamang Phulbari Bangalkata songoni ong·a jeon sakgittam denggu dakgipa manderang buring jolo matchu moangmitingo silchidarerangko ra·e chadrapenba rim·srukangaha.
March 21 tariko WGH District Police dol, SF 10, Dadenggre aro Damal A·sim thana baksa am·sandina a·bachengaha. Uamangko Dipogre A·sim Chiring songo napkete dongenggipa biaponiko pring seng·ani somoio rim·na man·aha. Denggu dakgiparangoni saksa police baksa chagronggrikon slai goaha jeon adita naljoknagita gogrikchakanio saksade a·damon siaha. Raksan M Marak-ko oksiko guli nangani gimin Dadenggre PHC-oni Tura Civil hospital-ona ra·baon janggi galaha. Sakgni gipin saknaa man·gipa Chingsan M. Marak aro Sengchuang M Sangma-ko police-rang rim·aha.
Sengchuang M. Sangma, ASAK dolni Miksong ine mingkilakgipa gitcham mande ong·a. Ua ja 1 skang Tura pattokoni bilsi gni mang donge bail-o jokaha. Police dolrang uamangoniko an·tang tarigipa shot-gun, chongipa Puma bag aro chakkuko man·aha.
Rim·sruka man·gipa, unikoa sakgni rim·a man·gipa manderangna sanna bannaniko on·angenga. WGH District Police-rang manderangko simsake dongchina aro maiba ong·gija dakgipa kamrangko nikode Police Control Room, Tura-ni 8837423053 aeo 9089199064 number-ona ka·china u·iataha.
