College of Community Science (CSS), Central Agricultural University (CAU) Tura kilchap bikotani aro badingani bidingo “Medical Textiles Products from Comilla Cotton and Enterprise Development” katta bichongko done salbongana ong·atgipa workshop mijal salo matchotangaha.
Ia workshop-ko Garo Hills a·jani manderangna kilchapko sanna bannanio jakkalna man·aniko u·ie masie ra·an baksana bosturangko bading chiwale cha·anirangko bilakdapatna miksonge ong·atangaha. Workshop-o bako ra·giparangna jaktangchi ka·e niani, kilchapko nate bikotani, sanna bannanio jakkalani bosturangko tarina, nachil rongtalatna jakkalgipa bosturangko tarie bading chiwale cha·ani cholrangkoba skie on·angaha.
Comilla Cotton Project-ni Principal Investigator Dr. Jyoti V. Vastrad, ia workshop-o bako ra·giparangna dingtang mancha re·bae skie on·gipako mittelan baksana ia workshop-ko songtango bading chiwale cha·giparangna kilchapko tarie sanna bannanio jakkalna tarigipa karkanarango palskana man·anikoba u·iatangaha.
Ia program-o bako ra·giparangna ge·a gamanio jakkalgipa bosturangko aro certificate-rangkoba on·angaha.
