North Garo Hills a·jani Badaka-o Ildek chibimako ka·sotenggipa RCC dolongko matchote tarina ru·utengani gimin Adokgre Regional Unit-ni AHAM dolrang, jolni aro wilwilao songdongenggipa manderangni palo kamko ta·rakatchina Chief Minister Conrad Sangma-na u·iataha. Ian Kharkutta-Dilma A·pal aro Adokgre songrangna namen gamchatbegipa rama ong·a ine AHAM janapataha.
Uamangni RTI ka·anio ia RCC dolongko 2018 bilsini January 3 tariko chamataha jekon 2020 January 3 tariko matchotatna somoi tik ka·giminko u·iaha. RTI o aganchakanigitade, ia dolongko rikna 2019 November 21 tarikoni kam ka·na a·bachengaha. Gitalbatsranggipa report-o parakanio 25% san kamrangko ka·kuenga aro dambri span-ni palo damsakosan tarikuenga ine u·iaha. Ian bilsi 5 batpiloba kamrang namen ka·sinaniko mesoka ine AHAM parakataha.
Ia project-na chu·gimik gong cr 17, 59, 91,985 tangkarangko chamataha aro contractor-ni okgimin cr 9, 99, 55,018 tangkarang ong·a. Matchotgimin Kamrangko niatode tangkarangko jakkalsretaniko nikna man·gen aro tik ong·gijanirang donggen ine AHAM parakataha. Ia kamko M/S M.D Construction, Fancy Valley Tura, G. Harlalka na on·aha. Contractor an·tangan kamrang ja·manchakenganiko daito ra·na nanga aro kamrangko ta·rakatna ja·ku ga·na nanga ine AHAM janapataha.
Iana agreba, RTI ka·e man·anigita, tangka okaniko aro kam ka·anio jakkalsretanirangko name am·sandichina sorkariko didiataha. PWD code aro Meghalaya Infrastructure Development niamgita project-ko matchotatna daito gnanggiparang nirokna nanga aro jakkalsretanirang donggenchimode sastiko on·a ja·ku ga·na nanga jekon uamang dakjaha ine Sangma-na u·iataha.
Uni gimin uamangni suk ong·gijani baksana songni manderangna re·na dona namen neng·nikaniko man·enganina CM office-ko nirokatenba project-ko somoigita matchotatchina AHAM didiata.
