West Garo Hills, Tura-ni ISBT-o National Science Day-ko re·baenggipa March 28 oni 29 tarikona ong·atangna tik ka·aniko State Council of Science, Technology & Environment (SCSTE) parakataha. Ia program-ona Chief Minister Conrad Sangma mongsonggipa sokgipa ong·e bakko ra·ange, Tura-ni Digital Planetarium-koba oprake a·bachengate on·anggen.
Ia salgni-na ong·atna amenggipa program-o 2023-24 bilsio MBOSE porikkao class X aro class Xll-ni chatro chatrirang jemangan Mathematics aro Science subject-rango nambate marks-rangko man·e chu·sokgiparangko mande ra·anikoba dakangjolgen ine SCSTE u·iatangaha.
Ia program-o STEM Lab-ko a·bachengate on·e, Science & Technology, Engineering aro Mathematics baksana Science on wheels ni bidingo songadam nokadamrango scientific nigita ma·sie ra·na dakchakna cholko ra·bagen. Unbaksana Chess Pa jekon Khasi aro Garo ku·sikona pe·giminkoba chess-na gisiko nanggiparangna didianiko on·a oprake on·anggen ine SCSTE parakataha.
Ia program-o State level-nigita susaanirang jekai quiz, noksa sale rong nongani, jawilwat tariani, kan·dikgipa reels, model exibition aro engineering project-rangko ong·atanggen.
Ia program-ona skul-ni chatro chatrirangko, science-ni bidingo ma·sina sikgipa aro songdongenggipa pilak manderangko re·bae bakko ra·chinaba SCSTE-ni Asst. Research Officer Shaprang Sawkmie didiangaha.
