Leader of Opposition (LO) Dr. Mukul Sangma, mijal salo Tura Government Medical College-o rika cho·ani kamrangko uni adita party-ni ka·rimskarang baksa re·ange nirokeaniko dakangaha. Sangma, koborna parakatengon, ia project ma·mong sorkarioni Meghalaya a·dokna pakwatatgipa jekon uni somoio ra·bagipa ong·a ine parakangaha. Ia medical college-na pilak dakna nangnirangko dake 2017 bilsio kamrangko ka·na a·bachengaha aro ka·donganigitade bilsi 3 mangon matchotatna dongimin ong·a indioba da·o 2025 bilsi ong·piloba matchotkujaenga ine Sangma aganangaha.
Ia college-ko matchotatna Government of Inida (GoI) ni on·gipa tangkarang chu·ongagita donga, indioba somoigita matchotatjaode bosturangni dam bilsina batroroengani a·sel tangkarangko nangdapgen ine Sangma aganangaha. Ian skanggipa list-o GoI-ni chamata man·gipa project ong·a, indioba da·onan matchotna man·kujaenga aro niatgenchimode Meghalaya-na bilsi gni ja·man chamata man·gipa a·dokrang medical college-ni class-rangko a·bachengtokengjok ine Sangma aganangkuaha.
Sorkarionigita re·anggipa assembly session-o matchotatna ku·chakanirangko dakaha, uandake matchotatgenchimoba miksonganiara ta·rake medical course-rangko a·bachengna nanganisa ong·enga. College-ko a·bachengatna man·ode je dedrangrang doctor ong·e a·dokna chigana dangdike on·a sikgiparangnasan cholko on·aigija manderangna a·palchi rimna nanggija ia college-on koros nanga gri sanna bannaniko on·a man·gen ine Sangma aganangaha. Uni gimin ia college-ko matchotmanahaoba pilak namgnirangkode toe mesokna man·jawa ine ua aganangkuaha.
Indake ong·genchimoba, college-ni ja·manchakrikenganiko darangkon nie dongjachina Sangma didiataha. College-ko matchotatnagita ja·ku ga·na sorkarini aro sakantinin daito ga·aka. Uni gimin, ia project-ko matchotatna rake kam ka·enga aro sorkariko ia college-o academic session-ko a·bachengatna didianiko on·enga ine Sangma aganangaha. Pilak kam ka·anirangko nigenchimode mikkang bilsio academic session-ko a·bachengatna man·a nanga aro ja·manchakna nangani dongjaha ine Sangma agandapangaha.
