Tura Chandmari GBHSS kal·chakramo ong·atenggipa Super 5 NJY Memorial Cup 2025-ko da·al saloni a·bachengataha. Ia tournament-ko ICFAI University, unbaksa District Football Association aro District Sports Office nangrime ong·atenga jekon da·al pring 10 bajioni opening ceremony-ko ong·ate oprake on·angaha.
Opening ceremony-ko English Department-ni HOD aro Assistant Professor Karishma Dahal dakdilaha. Sokbagipa manderangna rimchaksoani kattarangko Management Department-ni Assistant Professor, Chompaboti Hajong aganangaha. Unikoa, Vice Chancellor, Dr. Alicia Gatphoh, chadamberangni tang·doanina aro songsalo bakrimaniko ra·bana sports-ni gamchataniko aganangskaaha.
District Sports Officer, Saljagring M. Marak, tournament-o bakko ra·gipa dolrangko jinmana parakange kal·susaanio ja·rikna nanggipa niamrangko agane on·angaha. Bon·kamao English Department-ni Assistant Professor, Abijit Sarkar, bakko ra·giparangko, bakrimgiparangko aro program-o agangiparangko mittelangskaaha.
Ia kal·susaanio dol 30 mang bako ra·enga jekon sal 3-na ong·atenga. Tournament-ko ong·atani bako sports-ni namgipa gunko manderangni gisepo ra·bana, jinma bakrimani aro jolni changa sapaniko tang·doatna ka·dongsoani gnang.
