EGH-ni District School Education Officer (DSEO), Williamnagar songjinmao da·al salo “Science, Mathematics and Environment Exhibition for Children” ko DRDA Hall – II o ong·atangaha. Exhibition ona Additional Deputy Commissioner (ADC) aro District Planning Officer, DA Sangma mongsonggipa ong·e sokbaaha.
Mongsonggipa sokgipa a·jani ADC program-o aganengon science-ni gamchataniko, physics-ni nangchongmotgipa law-rang, AI aro uandake gipinrangko janapange science subject-ko skigipako a·jao poraiani gadangko tang·doatnagita skanggipa iarangni bidingo ma·sianiko on·china didiangaha. Program-ni bakko DSEO aro SDSEO-ba speech on·angaha.
Ia exhibition-o, pilak secondary aro higher secondary school-rangni chatro chatrirang bako ra·aha. Uamang ia a·damko chol ra·e science, mathematics aro environment ni a·bao an·tangtangni u·i ma·sianiko mesokangaha. Ian poraia skianiko namdapatna, unbaksana dingtang dingtang school-rang baksa bakrime saksa sakgipinoniko skie ra·na namgipa cholba ong·a. Ia exhibition salsanisan ong·a aro da·al matchotaha.
